شعب يحب يتشيحط
احنا شعب يحب التشيحط والتميلح .. ويوم كنا صغار كان رقم السيارة قضية مصير لدى بعض الناس .. قضية أكون أو لا أكون.. فتجد سيارة كحيانه ما تسوى فلس رقمها (1).. والغريب أن رقم السيارة أحيانا يكون أغلى من سعر السيارة نفسها.. فقامت حكومتنا الرشيدة بالغاء جميع اللوحات السابقة واستبدالها بلوحات بالكمبيوتر اللي ما فيها واسطه وصار أقل رقم فيها اربع ارقام .. مما جعل الخفير يشفط على الوزير
وبعد ما انتهينا من أزمة أرقام السيارات جاءت أزمة أرقام التلفونات وصار عندنا رقم ذهبي وفضي وبرونزي ونحاسي ونعالي
و لاني لا أقضي في الكويت الا شهر واحد في السنه فآثرت اقتناء الرقم النعالي وهو رقم لايحفظه اثنان و لايتشابه فيه رقمان
اتصلت بأحد الزملاء مرة وثانيه وثالثه وما رد علي وبعد ما شفته سألته ليش ما ترد يا ... ويا.. ويا ...و
قالي هذا رقمك .. اسمحلي احسب واحد من العمال داق علي .. "ايا اللي ما تستحي"ـ
وبعد ما خلصنا من سالفة لوحات السيارات رجع السيناريو مرة ثانية ولكن بالمحافظات هذه المره .. ولان السيارات اللي من جنوب الكويت أو شمالها ما تسوى بيزه مع احترامنا للجميع .. لذلك يحرص الكل على اقتناء لوحة العاصمة
وعندما قررت بيع سيارتي بداعي السفر أتاني أحد صغار الشريطية اللي مصدق حاله وقعد يتفلسف على مخي
الشريطي: هذا سيارتك فاتحها من الوكالة ولا شاريها مستعمله
امرؤ القيس: يا بعد عمري والله فاتحها من الوكالة
الشريطي: ها .. انت ساكن في أحد مناطق العاصمة .. ليش لوحتك الفروانيه!!ا أكيد شاري السيارة مستعملة
امرؤ القيس بينه وبين نفسه: يعني صايد الحركة الحبيب
امرؤ القيس: اكذب عليك يعني؟ يا حبيبي مناطق (اليرموك - قرطبه - السره) كانوا ضمن محافظة العاصمه فجاء أحد المسؤلين في غفلة من الدهر وقرر أن يضمنا الى محافظة الفروانية وبعد سنتين رجعونا العاصمه مرة ثانية ويوم شريت سيارتي كنا نتبع محافظة الفروانية ولاني ما أهتم بهالسوالف ولو انشاالله لوحتي من محافظه قلعة وادرين -على قولة الوالده - لكن قلعة وادرين هذي ما أدري وينها ؟؟ ياريت وحده من المدونات المحترمات - بكسر الياء-من جماعة واخزياه وسليمه تصكك- يقولولنا قلعة وادرين هذي وينها؟؟
الشريطي: اها هيج عاد .. قول من أول
امرؤ القيس بينه وبين نفسه: قلت بس انتا ما تفهم
ربعنا تبي تقص عليهم قولهم
VIP
لعنا أبو خامس هالكلمة .. والكل غصب يبي يصير في أي بي .. فيزا في اي بي .. حملة في اي بي .. حلاق في اي بي .. خباز في اي بي .. يا جماعة الفي أي بي لرجال الاعمال مو لكم
حتى البنوك عندهم حسابات
VIP , IP, P
وعلى قولة المثل "اذا أنا أمير وانت أمير .. من يقود الحمير"ـ
فاذا انا في اي بي وانت في اي بي منو الاي بي والبي
وبعدها طلعتنا سالفة التشيحط بالدرجات الاكاديمية .. واللي غصب بيكون اكاديمي ومهندس ورايح شاري الشهاده من الدول اللي خبري خبرك وتلقاه مهندس وحالته حاله وما يعرف الفرق بين التوصيل بالتوالي والتوصيل بالتوازي
حتى الماجستير والدكتواراه صارت بفلوس .. وفي مكتب بالديره تقوله الشهاده اللي تبيها ويأتي بها اليك قبل أن يرتد اليك طرفك من بلغاريا أو الدول اللي لك عليها
أنا شخصيا لا أعترف بأي دكتور الا اذا كان أكاديمي .. جامعة .. تعليم تطبيقي ..الخ فشهاده الدكتوراه هي شهادة اكاديمية قبل كل شئ
و الان فقد ظهر نوع جديد من التشيحط .. يسمى التشيحط الانترنتي.. لا ضاق خلقي قعدت أفتر على المدونات وأقرأ
About me things
واقعد أضحك .. تجد العاشق الولهان .. وتجد الحلو توم كروز العرب .. وتجد الحلوة المزيونه ملكة جمال الخليج .. والرومانسي المعذب .. والشاعر أبو الربابة اللي يتغني بجمال ليلى .. و الحبيب الفلنتايني بتشديد الباء ..
وعلى سالفة أرقام السيارات .. الله يعينكم يا السعوديين على أرقامكم .. يعني لو يكون رقمك خبل أو أثول أو دلخ مثل رقم بشير في طاش ما طاش شتسوي
أحلي شي في أمريكا أنك تختار الرقم اللي تبي والاحرف اللي تبها .. تخيل يسمحون بهالشي عندنا .. تصير مصيبه .. اتوقع ترتفع نسبة الحوادث لان ربعنا ملاقيف .. فالكل همه أن يقرأ لوحة اللي جدامه وراه وعن يمينه وشماله وفوقه وتحته
ما عليه المواضيع داشه عرض ببعض .. الصراحة ما لي خلق أنظم أفكاري .. السموحه منكم
posted by امرؤ القيس @ 1:00 PM
18 Comments:
لووووووووووول
سوالفك حلوه
عجبتني vip,ip,p
والله هم شاطرين بالتفشخر على بعض والا اتحداهم يسوون هالسوالف على اللي اقوى منهم
والمشكله كلها على اشياء سطحيه وصدقني اذا ما صرت مثلهم عندك هالنظره الماديه بكل شي تصير قروي ومتخلف وبيئه
صدق حتى انا ابي اعرف قلعة وادرين هذي وينهي؟؟ سمعت مره انها جنوب الرياض ما ادري هذي اشاعه والا لا
وعلى لوحات السيارات .. ياقدمهم الناس وصلوا القمر وهم للحين كل واحد يبي لوحة سيارته مميزه
يكفي الصجه اللي صارت على
أحب 666
لكن االمصيبه اذا صارت الكلمه مهب زينه من جد وهقه الواحد المفروض يلبس اللوحه نقاب عشان محد يشوفها
مافهمت وجهة نظرك بالنسبة للشهادات العليا!:)
خل اقولك سالفة سخافة الناس وكيف انهم يهتمون بالمظاهر فقط. لما وصلت 18 خذيت سيارة البيت .. واستمريت عليها .. وتحملت تعليقات الشباب لانها قديمة. خلصت الجامعة وتوظفت والكل مستغرب ليش ماشريت سيارة جديدة .. يا يبا ماني شاري سيارة شعليكم .. مادري!! .. عقب ماكملت نص ديني .. طرا على بالي اشتري "اترك" مثل مايقول الامريكان .. تليقفوا شلون بتركب زوجتك وياك فيها !! ياخي شعليكم .. مادري!
فصدق من قال طنش تعش
ومن راقب الناس ماتت امه ;P
~ se3loah ~,
loool
يلبس اللوحة نقاب حلوه
لوحاتكم القديمه كانت أحلى
صج انها سبعين الف رقم لكن تظل أفضل
من الاحرف
الطارق,
loool
للحين الفاست تلكو مأذينكم
حول كوالتي أبرك لك
عبدالله,
قصدي أن كثير من الشهادات الاكاديمية مجرد كذبه كبيره واللي يغط سبوعين ويرجعلك دكتور تراه نصاب
صاحبي كان وده يدرس في مصر وراح أحد مكاتب التقديم هذه وقاله الموظف اذا تبي ماجستير ترا عندي
وكأنه يبيع بضاعة وقاله تروح اسبوعين ثلاثه بلغاريا وترجع من حملة الماجستير بالمبلغ الفلاني
كثير من الناس يهمه فقط أن يحصل على حرف الدال قبل أسمه .. من أجل انتخابات مجلس الامه أو غيرها
فلا يغرك كثره الدكاتره عندنا
وفعلا طنش تعش تنتعش
LOL
صدقت .. المظاهر علّة من علل مجتمعنا الخليجي بالذات
و خلني أعترف اني من اللي يتأثرون فيها بكثير من الأحيان
بس يخوك العيشة برّة و شوفة الفقارة و عدم الإهتمام بالشكليات خلّت الواحد يطيب من هالعلّة و لله الحمد
عبدالله
سالفة -الترك- اعجبتني
ماعليك منهم يا ولد الحلال و خلّك على موترك دام إنّه يوصلك مشاوريك و فيه مكّيف
القيس .. اذا سوالفك جذي حزّة الأفكار المعفوسة .. عيل شلون بتصير لما ترتبها ؟
:))
عندنا و عندكم خير,الله يفكنا من البلا
لوووووووووووووووووووووووووول حلوه يابوقيس
يردك ربي بالسلامه اول
وبعدين انا سمعت يوصل فرق السعر بين سيارة العاصمة وسيارة الجهرا حول ال 3000 كويتي
عادي كل شي جايز
جان تبي تعرف الارقام بعد
فوق ال 20 الف
وفي الامارات لوحات السياره بسعر بيت بالضاحيه
وارقام بسعر سياره فوضه
eb9ara7a,
على سالفة اللي بره وعدم اهتمامهم بالمظاهر عندي صاحبي في الجامعه مصري كل ما رجعت الكويت يوصيني اييبله درزن فنايل داخليه ودرزن مكسرات
لغير الناطقين بالكويتيه المكسرات ليست الحب والفستق انما هو السروال الابيض الطويل ويصنف من الملابس الداخليه
قلتله انتا شتسوي فيهم سنويا اييبلك درز كامل
وبعد كم يوم كانوا الشباب مجتمعين عندي بالشقه وشقتي جنب الجامعه يعني مأهوله بالسكان
ولا الحبيب ياي الشقه بمكسر وفنيله داخليه
قلتا يا حبيبي انتا وين قاعد لابس ملابس داخليه وقاعد تتمشي بالشوارع استح
قالي " يا عم هو في حد سائل"ـ
دول بيحسبوه لبس شعبي خليها على الله
أثاري الحبيب قاعد يكشخ بالملابس الداخليه
موتني من الضحك
Raed,
اي والله هالمرض منتشر في كل دول الخليج
الظاهر الفلوس لها تأثير
q8lover,
الفرق بين لوحة العاصمه والجهره 3000!!!
والله هذا مشروع تجاري ممتاز .. اسجل لوحات الجهراويه والمنطقة العاشرة على بيتنا واخذ 1500 على اللوحة
والامارتيين الله يعينهم حاشهم اللي حاشنا في السبعينات والثمانينات
هذي مشكلة اللي عنده فلوس وما يدري شسوي فيها
ماشالله عليك ترضى بالفروانية !!!
:p
ماقدر أعلق لأني أعترف (بلا فخر)إن بعض هالشغلات اتهمني
hehhe :)
LOL !
سلملي على بو مكسر
و طرشله فنايل علاّق حق الصيف
Ra-1
والله مو قضيه اني راضي باللوحه .. القضية ان مالي خلق أروح أغيرها .. وانتي عارفه الاجراءات اللي عندنا
ولو أدري أن السعر بيفرق معاي جان غيرتها من زمان
eb9ara7a
يا معود أشوه ان طالب فنايل عاديه لو طالب بوعلاق جان فضحنا بين الله وخلقه
:D
هاهاهاهاهاها والله صدقت يا امرؤ القيس فعلا الديره صارت تفلسف وبس لي درجة تمشي بالشارع تشوف ياهل توه بالابتدائي بيده موبايل لا ورقم احلى من رقمك والله مشكله محد حاس كلش
موضوع حلو
في الإمارات على الأقل استفادوا من الأرقام الحلوة والصغيرة باعوهم في المزاد العلني للذي يدفع أكثر
وبعض اللوحات وصلت مبالغ أكثر بكثير من السيارات التي توضع عليها
والفائدة ترجع لميزانية الدولة
Hashemy,
اتوقع ان خطي انقطع صارلي سنه ما استخدمته
انشاء لا رجعت يكون الاتصالات مجهزين دفعة أرقام حلوه يديده
بس يخوك تعودنا على (9)ـ
q8links,
لوحات بالمزاد العلني والله ما أشوف لها داعي كله رقم
وميزانية الامارات عليها قاصر
Interesting website with a lot of resources and detailed explanations.
»
Cool blog, interesting information... Keep it UP Wood chip dryer power plant 1941 ford 2 door sedan Saunas pittsburgh Wheelchair armrest bags 1986 900 saab saab awd
Excellent, love it! »
Post a Comment
<< Home