Tuesday, December 27, 2005

we love kuwait



وصلني ايميل من مجموعة تطلق على نفسها
we love Kuwait
الصراحة المشروع رائع .. ولو عندي عيال .. كان شريتلهم من هالكتب المفيدة .. ولا تقولون قاعد اسويلهم دعاية .. ترا والله ما أعرفهم .. ولكن اعجبت بمشروعهم .. فزوروا موقعهم وشوفوا بنفسكم
يقولون

نحبج يا الكويت-لون وتعلم" هي مجموعة كتب للتلوين تعد الأولى من نوعها في الكويت حيث أنها تحمل الخصوصية الكويتية وتربطها برسائل تربوية وتوعوية وتعليمية في شكل صفحات مسلية للتلوين. تهدف هذه الكتب إلى:ـ

نشر الوعي الصحي وبيان أهمية تغذية الأطفال السليمة

غرس مبادئ وقيم إنسانية عديدة في نفوس الأطفال مثل قيمة الرفق بالحيوان وعدم الاسراف في الماء إضافةً إلى قيمة المحافظة على البيئة.

نقش حب الكويت في عقول ونفوس الأطفال وترسيخ الشعور بالانتماء والغيرة على الوطن

ومادام أن مشروعكم يهدف الى ترسيخ الانتماء والغيرة على الوطن فخلوني اقترح عليكم بعض الاقتراحات لعل وعسى:ـ
علموهم أن البوق حرام واللي يبوق الله ما يحبه .. وخاصة اذا كانت أموال عامة .. وخاصة اذا كانت بلدك في أزمة .. وانت يا حظي وزير .. ومسؤول .. ومن علية القوم ..و آخرتها مسوي نفسك شريف روما!!ا
علموهم أن المسؤولية تكليف لا تشريف .. واذا كنت مسؤول وكان التصويت في قضية تخصك وتفيدك فالمفروض انك ما تصوت .. وتطلع من الجلسة .. مثل قضية المديونيات!!!ا
وعلموهم انك لما تقترح مشروع يخدم البلد .. فليكن مصلحة البلد همك .. وليس همك أن تقتطع جزء من الكيكة وتأخذ حصتك مثل مشروع المدينة الاعلامية!!!ا
وعلموهم ان صوتك أمانه .. ولا تبيع بلدك وضميرك مقابل 500 دينار وساعتها بتكون قيمتك بقيمة ضميرك الي بعته .. بل أقل من ذلك!!!ا
وعلموهم احترام القانون والدستور .. واذا صرت عضو مجلس أمة .. لاتروح تحوس في المخافر بانصاف الليالي تطلع زوير وعوير والمنكسر والي مافيه خير!!!ا
ومشكورين على هالجهود .. و لعل وعسى يطلع لنا جيل .. يحقق ما عجزنا نحن عن تحقيقه!!ا
واللي عنده اقتراحات لهم فالمجال مفتوح

11 Comments:

At 2:02 PM, Blogger Яeema said...

i love these books too!
bright idea!

 
At 3:34 AM, Blogger ~ se3loah ~ said...

والله فكره حلوه

الله يوفقهم مادامهم يسوون شي مفيد لوطنهم

المفروض نشجع اللي مثل هذولا بدال السوالف التافهه اللي كلن يتكلم عنها

 
At 12:45 PM, Blogger Q8LoVeR said...

شي جميل جدا
بس انا اقترح خل يعلمونهم اول شي انها قيم اسلاميه قبل ما هي قيم انسانيه ما اظن انه يظر .. لان واضح الاجيال القاده الدين يرفرف فوق روسهم كلهم حفظة قرآن ماشاء الله :> ماقول الا الله يثبتنا ويهدينا ويحفظ عيالنا واعفادنا
لكن فعلا مشروع جميل لهم التوفيق ان شاء الله بس اركز على موضوع القيم الاسلاميه .
تحياتي لك حبيبي مواضيعك جدا رائعه

 
At 12:55 PM, Blogger Q8LoVeR said...

مكتوب في الموقع
....


" أ ب ت " هو أحد كتب هذه المجموعة .

يقوم هذا الكتاب بتعليم الطفل الأحرف الأبجدية من خلال تلوين الرسومات

......

لووووووول زين اذا الحروم الابجديه أ ب ت عيل الحروف العاديه شلون
انا من كنت في الابتدائي والروضه والثانويه 12 سنه تشعيب ادبي بعد علموني كل سنه انه الاحرف الابجديه ابجد هوز حطي كلمن أ ب ج د ه و ز ح ط ي ك ل م ن

الحين اذا اول التعليم غلط تالي شنو
_____
لا بس ان شاء الله يتداركون الغلط المليق هذا ويصلحونه
الله المستعان عربي غلط باجر قرآن شلون يقرون :D
______
اخوي ليش بس بلوقك لما ارد يطل مني اكتب الاحرف الي موجوده بالصوره ؟ ترا شقني شق

 
At 1:58 PM, Blogger BitterSweet said...

Excellent initiative! I fully support it. Atimanna lihum kill ittawfeeq insh'Allah.

 
At 5:15 PM, Blogger امرؤ القيس said...

Q8LoVeR,

أتوقع جوجل يطلب منك تكتب الحروف
حتى تتعلم الحروف الابجدية بالانجليزي
:)
والله ما أدري لكن شي سخيف أن يطلب منك تكتب الحروف وكثيرا ما أعاني منها
احاول اعدلها

 
At 6:00 PM, Blogger امرؤ القيس said...

Q8LoVeR,
انحلت المشكلة

 
At 10:55 AM, Blogger Q8LoVeR said...

تسلم حبيبي
ماقصرت :)

 
At 4:37 PM, Blogger osuokcdave said...

This comment has been removed by a blog administrator.

 
At 5:15 AM, Blogger kila ma6goog said...

خوش مشروع و يستاهلون الدعم انشالله أول ما تولد زوجتي بالسلامة بشتري الكتب

بالنسبة للبوق و الفلوس الحرام فما فيها بركة , يعني الي يبوق ما يخاف الله يخسف فيه و يصكه بمرض أو شي يخليه ما يستانس بهالفلوس الحرام

 
At 3:07 PM, Blogger امرؤ القيس said...

kila ma6goog,
الله يرزقك الذرية الصالحة
فعلا مشروع يستحق الدعم
الفلوس والله ما تسوى يبيع فيها الانسان كرامته
والانسان شنو يبي غير الذكر الزين بين الناس
لا قالوا الناس فلان .. قالوا والنعم
مو والعنتين الله لايوفقه

 

Post a Comment

<< Home

online